کسی بھی کام کی خاطر تلف آرام کردینا

کسی بھی کام کی خاطر تلف آرام کردینا

ہمیں آتا ہے جب کرنا تو پورا کام کردینا

ہماری قوم کے ہر شخص کی بچپن سے عادت ہے

لہو کے قطرے قطرے کو وطن کے نام کردینا

میں ووٹر ہوں نئے یگ کا بخوبی جانتا ہوں سب

کسے کرسی پہ رکھنا ہے کسے گمنام کردینا

ہمارے شہر کے لوگوں میں یہ خوبی نمایاں ہے

لگا کر خود کی سب محنت کسی کا نام کردینا

ذرا محنت کی عظمت کو پرندوں سے کوئی سیکھے

تلاشِ رزق کی خاطر سحر سے شام کردینا

یہ انسانی جبلت ہے کسی کو دوش کیا دینا

جسے اونچائی پر دیکھو اسے بدنام کردینا

شکیل احمد پہ ایسے بھی خدا کا فضل ہوتا ہے

غزل ہو یا کہ نظمیں ہوں قبولِ عام کردینا

(شکیل حنیف)

بحر ہزج مثمن سالم

(مفاعیلن مفاعیلن مفاعیلن مفاعیلن)

اس ملت کی شان ہو تم (بہادر مسکان پر نظم)

اے بیٹی مسکان سنو

ملت کی پہچان سنو

آپ کی ہمت جرات نے

کلمۂ حق کی قرأت نے

پوری قوم کو طاقت دی

روتے دل کو فرحت دی

اور بڑھا ایمان ہے اب

جینا کچھ آسان ہے اب

فکروں سے آزاد ہوا

ہر مومن دلشاد ہوا

تم نے یہ بتلایا ہے

سب کو یہ جتلایا ہے

لڑکی ہو لڑ سکتی ہو

آگے تم بڑھ سکتی ہو

بیٹی میں دم باقی ہے

اب نا کچھ غم باقی ہے

چہروں کی مسکان ہو تم

اس ملت کی شان ہو تم

(شکیل حنیف)

مجھ کو بھی تم پڑھنے دو (نظم)

سنئے میرے ٹیچر جی

میں بیٹی ہوں بھارت کی

مجھ کو بھی تم پڑھنے دو

پڑھ کر آگے بڑھنے دو

روکو نا تم پڑھنے سے

مجھ کو آگے بڑھنے سے

مجھ کو بھی حق حاصل ہے

جو نا سمجھے غافل ہے

یہ واویلا کیسا ہے

کپڑا تو سب جیسا ہے

میں بھی تو سب جیسی ہوں

یونیفارم میں رہتی ہوں

سب کا ایک سراپا ہے

بس سر کو ہی ڈھانپا ہے

جب کووڈ نے جکڑا تھا

سب چہروں پر کپڑا تھا

وہ بھی یونیفارم نہ تھا

تب تو غلط وہ کام نہ تھا

میں نے بھی بس ویسے ہی

اس کپڑے کے جیسے ہی

سر پر کپڑا ڈالا ہے

کیا یہ کام نرالا ہے

چھوڑو نا ان باتوں کو

آؤ تھامو ہاتھوں کو

مل کر سب کو پڑھنے دو

سب کو آگے بڑھنے دو

(شکیل حنیف)

اگر جو روٹھ جاتے تم تو سمجھانے کہاں جاتے ۔ غزل نمبر 10 ۔ عکس دل

اگر جو روٹھ جاتے تم تو سمجھانے کہاں جاتے

تمہاری بزم سے اٹھتے تو ہم جانے کہاں جاتے

تمہارے ساتھ دل خوش ہے تمہارے پاس بہلا ہے

اگر تم ساتھ نا ہوتے تو بہلانے کہاں جاتے

ستائش کی تمنا حسن کو مخمور رکھتی ہے

اگر ایسا نہیں ہوتا تو دیوانے کہاں جاتے

لۓ جو سیلفی سب فیس بک پر ڈال دیتے ہیں

اگر یہ سب نہیں ہوتا تو اترانے کہاں جاتے 

بہت اچھا ہے کہ شمع سرِ محفل ہی جلتی ہے

وگر نہ دید کی خاطر یہ پروانے کہاں جاتے

شکیل اپنی جو شہرت ہے وہ اردو کی بدولت ہے

وگر نہ ہم زمانے بھر میں پہچانے کہاں جاتے

(شکیل حنیف)

بحر ہزج مثمن سالم 

(مفاعیلن مفاعیلن مفاعیلن مفاعیلن)

ہمیں آتیں نہیں ہمدم لب و رخسار کی باتیں ۔ عکس دل ۔ غزل نمبر 9

ہمیں آتیں نہیں ہمدم لب و رخسار کی باتیں  

صنم کی یار کی باتیں دل و دلدار کی باتیں

یہ بیماری کا عالم اور یہ مندی کی تکلیفیں

کریں کیوں ریشمی پازیب کی جھنکار کی باتیں

ہمیں اپنوں سے الفت ہے انہی میں مست رہتے ہیں

بھلا کیونکر کریں ہم اجنبی اغیار کی باتیں

ہمارے حوصلے کو اور بھی دوچند کرتی ہیں

بڑا ہی فائدہ دیتی ہیں یہ اشرار کی باتیں

یقینا وہ حسیں بھی آج کی محفل میں آیا ہے

سبھی جو کر رہے ہیں حسن کے دیدار کی باتیں

غزل کا حسن بھی ہے ساتھ ہی لوگوں کی چاہت بھی

کہاں ورنہ شکیل احمد کہاں یہ پیار کی باتیں

(شکیل حنیف)

بحر ہزج مثمن سالم

( مفاعیلن مفاعیلن مفاعیلن مفاعیلن )

مودی جی اسکولیں کھولو (نظم)

مودی جی اسکولیں کھولو

اس بارے میں کچھ تو بولو

بازاروں میں بھیڑ جمی ہے

شادی کی محفل بھی سجی ہے

دھوم الیکشن کی جاری ہے

خوف کسی پر کب طاری ہے

کھیل کھلاڑی کھیل رہے ہیں

بند کو بس ہم جھیل رہے ہیں

مانتے ہیں یہ وبا بری ہے

لیکن اب یہ ساتھ لگی ہے

اس کے سنگ اب جینا ہوگا

کڑوا گھونٹ بھی پینا ہوگا

اس کی تو بس ایک دوا ہے

مالیگاؤں میں جو روا ہے

اس کو زیادہ بڑھنے نادو

جیسے ہی ہو اس کی دوا لو

سب نے ڈرنا چھوڑ دیا ہے

خبریں پڑھنا چھوڑ دیا ہے

اس سے لڑنا سیکھ لیا ہے

آگے بڑھنا سیکھ لیا ہے

ہم سب کی درخواست یہی ہے

آپ سے دل کی بات کہی ہے

کیوں بند ہیں اسکولیں بولو

مودی جی اسکولیں کھولو

(شکیل حنیف ۔ مالیگاؤں)

*मोदीजी स्कूलें खोलो*

मोदीजी स्कूलें खोलो

इस बारे में कुछ तो बोलो

बाज़ारों में भीड़ जमी है

शादी की महफिल भी सजी है

धूम इलेक्शन की जारी है

खौफ किसी पर कब तारी है

खेल खिलाडी खेल रहे हैँ

बंद को बस हम झेल रहे हैँ

मानते हैँ ये वबा बुरी है

लेकिन अब ये साथ लगी है

इस के संग अब जीना होगा

कडुवा घोंट भी पीना होगा

इस की तो बस एक दवा है

मेलगांव में जो रवा है

इस को ज़्यादा बढ़ने ना दो

जैसे हि हो इस की दवा लो

सब ने डरना छोड़ दिया है

ख़बरें पढ़ना छोड़ दिया है

इस से लड़ना सीख लिया है

आगे बढ़ना सीख लिया है

हम सब की दरख्वास्त यही है

आप से दिल की बात कही है

क्यों बंद हैँ स्कूलें बोलो

मोदीजी स्कूलें खोलो

(शकील हनीफ, मेलगांव)

اگر اپنا نہ ہو تو ہر خزینہ چھوڑ دیتے ہیں ۔ غزل نمبر 8

(عکس دل سے آٹھویں غزل)

اگر اپنا نہ ہو تو ہر خزینہ چھوڑ دیتے ہیں

زمیں ہو زر ہو یا کوئی حسینہ چھوڑ دیتے ہیں

ہم اک درویش ہیں صاحب ہمیں دولت سے کیا مطلب

ملے کتنی بھی قیمت کا دفینہ چھوڑ دیتے ہیں

کسی کی اصل صورت تو نظر آتی ہے غصے میں

کہ اس میں اچھے اچھے بھی قرینہ چھوڑ دیتے ہیں

برے حالات میں اچھے برے کا علم ہوتا ہے

لگے جب ڈوبنے چوہے سفینہ چھوڑ دیتے ہیں

یہ سچّائی کی طاقت ہے کہ جھوٹے سورما سارے

ہمارا نام سنتے ہی پسینہ چھوڑ دیتے ہیں

پہن کر خاص اک چشمہ شکیل اکثر ادب والے

اٹھا کر کانچ کے ٹکڑے نگینہ چھوڑ دیتے ہیں

(شکیل حنیف)

بحر ہزج مثمن سالم

(مفاعیلن مفاعیلن مفاعیلن مفاعیلن)

جیسا جنون سرپھرے بلوائیوں میں تھا ۔ غزل نمبر 7

 جیسا جنون سرپھرے بلوائیوں میں تھا

ویسا ہی صبر امن کے شیدائیوں میں تھا

جس کو میں ڈھونڈتا رہا ہر پل ادھر ادھر

وہ تو مرے وجود کی گہرائیوں میں تھا

بعدِ وصال دل سے یہ اٹھتی رہی صدا

کتنا سکون ہجر کی تنہائیوں میں تھا

جو لطف جو سکون ہے پیپل کی چھاؤں میں 

ویسا مزہ نہ شہر کی رعنائیوں میں تھا

سورج بھی دیکھ کر اسے چپ چاپ ڈھل گیا

کچھ ایسا درد شام کی پرچھائیوں میں تھا

جس کی شکیل سب کو ہی ہوتی ہے آرزو

ویسا ہی پیار میرے سبھی بھائیوں میں تھا

(شکیل حنیف)

بحر مضارع مثمن اخرب مکفوف محذوف

(مفعول فاعلات مفاعیل فاعلن)

ہمیں معلوم ہے ہمدم کہ الفت کس کو کہتے ہیں ۔ غزل نمبر 6

 ہمیں معلوم ہے ہمدم کہ الفت کس کو کہتے ہیں

وفا کی پیار کی انمول دولت کس کو کہتے ہیں

نہ چھوڑا آخری سانسوں تلک محبوب کا دامن

کوئی دیکھے ذرا آکر محبت کس کو کہتے ہیں

ذرا دو پل ہمارے ساتھ بھی تم بیٹھ کر دیکھو

پتہ چل جائے گا سچی رفاقت کس کو کہتے ہیں

کسی کے ساتھ نکلو اور کچھ آگے نکل جاؤ

پتہ چل جائے گا تم کو عداوت کس کو کہتے ہیں

کسی نادار کے گھر بھی کبھی مہمان بن جاؤ

پتہ چل جائے گا تم کو سخاوت کس کو کہتے ہیں

نئے انداز کی نظمیں نئے انداز کی غزلیں

شکیل احمد سے تم پوچھو کہ ندرت کس کو کہتے ہیں

(شکیل حنیف)

بحر ہزج مثمن سالم

( مفاعیلن مفاعیلن مفاعیلن مفاعیلن )

طاری بڑا عجیب سا ہیجان کردیا ۔ غزل نمبر 5

 عکسِ دل سے پانچویں غزل

طاری بڑا عجیب سا ہیجان کر دیا

خوفِ وبا نے دیس کو سنسان کر دیا

شیطان چاہتا تھا کہ ایمان لوٹ لے

مضبوط رب نے اور بھی ایقان کر دیا

جنگل سے ایک شیر کے جانے کی دیر تھی

کتوں نے سارے دشت کو ہلکان کر دیا

جس باغباں پہ ناز تھا ہر پھول کو بہت

اس نے ہی سارے باغ کو ویران کر دیا

اپنی زباں سے اس نے تو کچھ بھی نہیں کہا

اپنے ہنر سے سب کو ہی حیران کر دیا

تجھ پر شکیل رب کا یہ احسان ہی تو ہے

جو مشکلیں تھیں ان کو بھی آسان کر دیا

(شکیل حنیف)

مضارع مثمن اخرب مکفوف محذوف

( مفعول فاعلات مفاعیل فاعلن )

یہ مانتے ہیں سیخ و کباب والے ہیں ۔ غزل نمر 4

یہ مانتے ہیں کہ سیخ و کباب والے ہیں

مگر ہم ان میں نہیں جو شراب والے ہیں

وہ ظلم کرکے بھی پہچان میں نہیں آتے

ہمارے سارے ستم گر نقاب والے ہیں

بزرگی آگئی لیکن جوان دکھتے ہیں

جو سر کے بال ہیں کالے خضاب والے ہیں

اگرچہ مندی ہے لیکن یہ بات بھی سچ ہے

ہمارے شوق تو سارے نواب والے ہیں

نبی کے صدقے میں جنت کا ہے یقیں ورنہ

ہمارے کام تو سارے عذاب والے ہیں

فدا جواں جو ہیں پروین تیرے شعروں پر

شکیل کے بھی تو شیدا حجاب والے ہیں

(شکیل حنیف)

بحر مجتث مثمن مخبون محذوف مسکن

( مفاعلن فعلاتن مفاعلن فعلن )

لافنا میں بھی نہیں تو بھی نہیں وہ بھی نہیں

لافنا میں بھی نہیں تو بھی نہیں وہ بھی نہیں

یاں سدا میں بھی نہیں تو بھی نہیں وہ بھی نہیں

ہم اگر انسان ہیں غلطی کا بھی امکان ہے

بے خطا میں بھی نہیں تو بھی نہیں وہ بھی نہیں

کب سبھی کچھ چھوڑ کر کس کو چلے جانا پڑے

جانتا میں بھی نہیں تو بھی نہیں وہ بھی نہیں

جس کو دیکھو دوسروں پر ہے فدا کیا کیجیے

بے وفا میں بھی نہیں تو بھی نہیں وہ بھی نہیں

پاک ہے دامن یہ دعوی کون ہے جو کر سکے

پارسا میں بھی نہیں تو بھی نہیں وہ بھی نہیں

سن شکیل احمد یہاں ہم سے بھی بہتر لوگ ہیں

انتہا میں بھی نہیں تو بھی نہیں وہ بھی نہیں

*(شکیل حنیف)*

بحر رمل مثمن محذوف

(فاعِلاتن فاعِلاتن فاعِلاتن فاعِلن)

کیسا بھی ہو دور بدلتے دیکھا ہے

کیسا بھی ہو دَور بدلتے دیکھا ہے

ہر ظالم کا جَور بدلتے دیکھا ہے

آقا کے پرنور قدم کی برکت سے

بختِ غارِ ثَور بدلتے دیکھا ہے

سایہ اپنے سر سے پدر کا اٹھتے ہی

لوگوں کو فی الفور بدلتے دیکھا ہے

مجھ سے بہتر علم تو تم سب کو ہوگا 

کیا کیا تم نے اور بدلتے دیکھا ہے

دنیا موسم دور زمانہ جو بھی ہو

کرلو اس پرغور بدلتے دیکھا ہے

جن کی خاطر درد شکیل احمد جھیلے 

ایسوں کا بھی طور بدلتے دیکھا ہے

(شکیل حنیف)

بحر متقارب مسدس مضاعف

(فعلن فعلن فعْل فعولن فعلن فع)

مجھ کو جو سچی داد اے ہمدم کہیں ملی

مجھ کو جو سچی داد اے ہمدم کہیں ملی

اہلِ ادب کی بزم میں یعنی یہیں ملی

اک روز سب ہی چھوڑ کے جانا پڑا مجھے

دنیا بہت پسند تھی وہ بھی نہیں ملی

گرداں رہا زمین کے چکر میں روز و شب

آخر ملی تو مجھ کو بھی دوگز زمیں ملی

پلکیں جھپکنا بھول گیا سانس تھم گئی

کچھ اس ادا سے مجھ سے وہ زہرہ جبیں ملی

یادوں کو میری اس نے رکھا تھا سنبھال کر

چھوڑی تھی جو بھی چیز جہاں وہ وہیں ملی

جو کچھ کہا تھا میں نے وہی سب ہوا شکیل

ہر بات ہی قیاس سے بالکل قریں ملی

*(شکیل حنیف)*

بحر مضارع مثمن اخرب مکفوف محذوف

(مفعول فاعلات مفاعیل فاعِلن)

سال نو یہ تو بتا

چپکے چپکے سے دبے پاؤں چلا آیا ہے

سالِ نو یہ تو بتا ساتھ میں کیا لایا ہے

پھر فسادات کی خوں ریز کہانی ہے کیا

پھر وباؤں میں وہ پہلی سی روانی ہے کیا

پھر سے بازار میں مندی وہ پرانی ہے کیا

کیا تری شکل وہی اب بھی وہی کایا ہے

سالِ نو یہ تو بتا ساتھ میں کیا لایا ہے

چپکے چپکے سے دبے پاؤں چلا آیا ہے

سالِ نو یہ تو بتا ساتھ میں کیا لایا ہے

پھر غریبوں کو ستانے کا ارادہ ہے ترا

دردمندوں کو رلانے کا ارادہ ہے ترا

آندھیاں پھر سے چلانے کا ارادہ ہے ترا

کیا بتائے گا بھلا کس کو بتا پایا ہے

سالِ نو یہ تو بتا ساتھ میں کیا لایا ہے

چپکے چپکے سے دبے پاؤں چلا آیا ہے

سالِ نو یہ تو بتا ساتھ میں کیا لایا ہے

پھر بھری جھومتی گاتی ہوئی گلیاں لے آ

درد کانٹوں کے سہے دلنشیں کلیاں لے آ

تلخ خواروں کے لئے قند کی ڈلیاں لے آ

تجھ پہ قربان اس انداز سے گر آیا ہے

سالِ نو یہ تو بتا ساتھ میں کیا لایا ہے

چپکے چپکے سے دبے پاؤں چلا آیا ہے

سالِ نو یہ تو بتا ساتھ میں کیا لایا ہے

(شکیل حنیف)

*(شکیل حنیف)*

*بحر رمل مثمن مخبون محذوف مقطوع*

(فاعِلاتن فَعِلاتن فَعِلاتن فِعْلن)